કાજુ કોરમા ખૂબ જ રિચ ક્રિમી ગ્રેવીવાળું એક ખૂબ જ સ્વાદિષ્ટ શાક છે. જે આપણે ઘણીવાર રેસ્ટોરન્ટમાં જઈને ખાઈએ છીએ. ઘણી વખત તેને ઘરે બનાવવાનું પણ મન થાય છે, પરંતુ આ શાક હોટલ જેવું બનતું નથી. આવી સ્થિતિમાં અમે તમને એક ખૂબ જ સરળ રેસિપી જણાવી રહ્યા છીએ, જેને અપનાવીને તમે ઘરે જ સ્વાદિષ્ટ કાજુ કોરમા રેસિપી બનાવી શકશો… ચાલો જાણીએ તેને બનાવવાની રીત.
સામગ્રી
કાજુ – 60-70 ગ્રામ, ટામેટા – 4-5, કાજુ – 10 મસાલામાં પીસવા માટે, મોટી એલચી-2, લવિંગ- 2-3, કાળા મરી – 7-8, તજ – 3-4, ક્રીમ – 150 ગ્રામ, આદુ – 1 ઇંચ, લીલા મરચા – 2-3, તેલ- 2-3 ચમચી (જરૂર મુજબ), કોથમીર – 3-4 ચમચી, હીંગ – 1 ચપટી, જીરું- 1/2 ચમચી, ગરમ મસાલો – 1/2 ચમચી, લાલ મરચું – 1/2 ચમચી, હળદર પાવડર – 1/2 ચમચી, ધાણાજીરું પાવડર – 1 ચમચી, મીઠું – સ્વાદ મુજબ
બનાવવાની રીત
ટેસ્ટી કાજુ કોરમા બનાવવા માટે સૌથી પહેલા ટામેટાં, લીલા મરચાં, આદુ અને કાજુને પીસીને પેસ્ટ બનાવી લો. આ પછી એક કડાઈ લો, તેને ગેસ પર રાખીને તેલ નાખીને ગરમ કરો. તેલ થોડું ગરમ થાય એટલે તેમાં કાજુ નાખી હલકા બ્રાઉન રંગના થાય ત્યાં સુધી સાંતળો. હવે તેલમાં જીરું પણ નાખો.
જીરું નાખ્યા પછી તેમાં હિંગ, હળદર પાવડર, આખો ગરમ મસાલો, એલચી નાખીને સાંતળી લો. હવે ટામેટા, કાજુ, લીલા મરચા, આદુની પેસ્ટ ઉમેરો. જોકે, ધ્યાનમાં રાખો કે જ્યાં સુધી તમને મસાલા પર તેલ તરતું ન દેખાય ત્યાં સુધી તમારે તેને ચમચાની મદદથી હલાવતા રહેવાનું છે.
પછી લાલ મરચું પાવડર પણ નાખી દો. હવે આમાં ગરમ મસાલો અને ક્રીમ ઉમેરો. પછી આ ગ્રેવીમાં અડધો કપ પાણી ઉમેરો. આ ગ્રેવીને તમે જેટલી જાડી કે પાતળી રાખવા માંગો છો, તે પ્રમાણે પાણી ઉમેરો. હવે તેને ત્યાં સુધી પકાવવાનું છે, જ્યાં સુધી ગ્રેવી ઉકળવા ન લાગે.
હવે આમાં થોડી કોથમીર ઉમેરો. ગ્રેવી ઉકળવા લાગે ત્યારે તેમાં મીઠું અને શેકેલા કાજુ પણ ઉમેરો. હવે તેને ઢાંકીને ધીમી આંચ પર શાકને 3-4 મિનિટ સુધી પાકવા માટે છોડી દો. આ પછી ગેસને બંધ કરી દો. શાકમાં ઉપરથી કોથમીરથી ગાર્નિશ કરો. હવે તેને રોટલી, નાન કે ભાતની સાથે સર્વ કરી શકો છો.